Gisuspende sulod sa 90 ka adlaw sa Land Transportation Office o LTO ang lisensya sa miyembro sa P-pop girl group nga BINI nga si Mikha Lim human siya makit-an sa usa ka live video nga giingong naggamit og cellphone samtang nagmaneho.
Makita sa maong video nga girekord ni Lim ang iyang kaugalingon samtang naglingkod sa lingkoranan sa drayber sa sakyanan sa wala pa kalit nga mahulog ang iyang cellphone.
Narekord usab ang iyang pagduko ug pag-abot sa ubos aron kuhaon ang cellphone, ug sa ulahi, ang paggamit niini gamit ang duha ka kamot samtang nagpadayon sa pagdrayb.
Tungod niini, nagpagawas ang LTO og Show Cause Order batok sa P-pop artist tungod sa posibleng paglapas sa Anti-Distracted Driving Act ug uban pang probisyon sa balaod sa trapiko sa nasud.
Gimandoan si Lim nga personal nga motungha sa buhatan sa LTO sa Nobyembre 20 aron ihatag ang iyang pormal nga pagpatin-aw kalabot sa insidente.
Gipasiugda sa pamunuan sa LTO nga patas ang ilang pagpatuman sa balaod alang sa kaluwasan sa kadalanan, diin bisan pa og sikat o dili ang usa ka tawo, gikinahanglan gihapon ang pagsunod sa mga balaod sa trapiko ug ipahamtang ang angay nga silot sa mga makalapas niini, sumala sa LTO Chief Assistant Markus Lacanilao.
