Nakakuha ang Pilipinas og duha ka kasabutan sa negosyo nga nagkantidad og 27 million US dollar gikan sa kompanyang sa China nga Somago atol sa ikasiyam nga China International Import Expo (CIIE) 2026, nga nag-abli og mas dagkong oportunidad alang sa mga prodyuser sa durian sa Davao.
Gipirmahan ang kasabutan alang sa strategic cooperation ug pagpalit sa frozen durian tali sa Somago ug sa mga kompanyang Eng Seng Food Products ug Maylong Enterprises Corp. Tumong niini nga palig-onon ang ilang komersyal nga relasyon ug makapagawas og dekalidad nga durian ngadto sa merkado sa China gikan Nobyembre 2026 hangtod Oktubre 2027.
Matod ni Agriculture Assistant Secretary Genevieve Velicaria-Guevarra, pamatuod kini sa paningkamot sa gobyerno nga himuong konkretong kasabutan ang mga oportunidad aron matabangan ang lokal nga mga mag-uuma ug mapalapdan ang merkado sa nasud.
Dugang ni Agriculture Secretary Francisco P. Tiu Laurel Jr., dako kini og ikatabang aron madugangan ang kita sa mga mag-uuma ug mapalig-on ang posisyon sa agrikultura sa Pilipinas sa internasyonal nga patigayon.
Gilangkuban sa 30 ka exhibitors ang delegasyon sa Pilipinas nga nagpromote sa nagkadaiyang produkto sama sa preskong durian, saging ug uban pang mga produkto isip pagpadayon sa malampusong partisipasyon sa nasud sa miaging mga expo.
