Nagapadayon ang paghinay sa manufacturing sector sa Pilipinas sa bulan sa Oktubre tungod sa huyang nga demand sa lokal ug internasyonal nga merkado, lakip na ang epekto sa El Niño.
Base sa survey nga gihimo sa S&P Global, mikunhod sa 49.1 points ang Purchasing Managers’ Index o PMI sa Oktubre gikan sa 49.6 points niadtong Setyembre, nga nagpakita sa padayon nga paghinay sa kalihokan sa mga pabrika.
Tungod sa huyang nga demand, mikunhod ang produksyon sa mga pabrika, hinungdan nga gipakunhod usab sa mga kompanya ang ilang gidaghanon sa mga empleyado.
Kini na ang ikaduhang sunod-sunod nga bulan nga mikunhod ang ihap sa mga trabahante sa manufacturing sector sukad niadtong Setyembre.
Matud sa mga economic expert, posibleng maapektuhan pa ang halin ug kapital sa mga negosyo tungod sa pagsaka sa interest rate sa Bangko Sentral ng Pilipinas.
Dugang pa, hangtod karon, wala gihapon mosaka ang gidaghanon sa mga bag-ong order ug wala usab modaghan ang pagkuha og mga bag-ong empleyado.
