Napildi si Alex Eala nga American tennis player Claire Liu sa final sa Hong Kong Open human mapildi sa straight sets, 3-6, 0-6.
Napakyas si Eala nga makuha ang iyang ikaduhang WTA title human makontrol ni Liu ang duwa, ilabina sa ikaduhang set.
Tabla pa ang duha sa unang set sa 3-3 apan nakalamang si Liu pinaagi sa lig-on nga service game.
Sa wala pa makaabot sa final, miagi si Eala sa sunod-sunod nga lisod nga duwa, lakip na ang taas nga semifinal match batok sa kanhi world number three nga si Maria Sakkari.
Posibleng nakaapekto usab sa kondisyon ni Eala ang kakapoy human sa sunod-sunod nga duwa. Sa final, mihangyo pa kini og medical timeout samtang nagduwa sa ikaduhang set ug gibendahan ang iyang tuo nga paa tungod sa gibating problema.
Bisan pa niini, gipadayon ni Eala ang duwa ug nakahimo pa og upat ka break point saves sa unang game sa ikaduhang set nga milungtad og kapin 26 minutos.
Bisan napildi, nagpabiling positibo si Eala ug gikumusta ang kadaugan ni Liu nga unang WTA tour title niini. Nagpasalamat usab siya sa mga fans nga padayon nga nagsuporta sa iyang karera.
