Naugdaw sa kalayo ang usa ka pwesto nga namaligya og pritong manok sulod sa gitawag nga Yellow Building sa Barangay Bula, General Santos City, human mosilaob ang kalayo kaganihang alas 8:20 sa buntag, Nobyembre 8.
Dali nga nangayo og tabang ang mga residente samtang misaka ang kalayo sa maong establisemento nga nahimutang sa unang andana sa building diin anaa usab ang usa ka dormitoryosa ika duha nga andana. Matud ni SFO2 Filamer Acob sa Bureau of Fire Protection o BFP-General Santos City, dali silang misanong human madawat ang report apan dako na ang kalayo sa ilang pag-abot. Naagapan dayon sa mga bombero ang sunog ug napugngan ang pagkaylap niini sa ubang bahin sa building.
Gikumpirma ni Rodney Manzanares, tag-iya sa maong pwesto, nga wala na nila maluwas ang mga gamit sa negosyo lakip na ang halin gikan gabii. Matud pa niini, nagluto sila sa dihang kalit nga misilaob ang kalayo nga misangpot sa pagkasunog sa tibuok pwesto.
Gibanabana sa BFP nga mokabat sa P70,000 ang inisyal nga kantidad sa kadaot nga nahimo sa sunog.
