Gibutyag ni Senator Panfilo “Ping” Lacson ang panginahanglan nga adunay opisyal nga transcript ug padayon nga livestreaming sa mga pagdungog sa bicameral conference committee aron masubay sa publiko ang mga kausaban sa 2027 national budget.
Matud ni Lacson, importante nga adunay opisyal nga rekord sa mga diskusyon sa bicam aron mailhan kung kinsa nga mga magbabalaod ang nagpanukala sa mga amyenda ug nagduso sa pagbalhin o pag-usab sa pondo sa mga probisyon sa badyet.
Gusto usab sa senador nga ipatik sa website sa Senado ang mga transcript aron mas sayon nga masusi sa publiko ang mga gihisgotan ug mga desisyon atol sa deliberasyon.
Plano usab nga dapiton sa bicam ang mga civil society groups aron magsilbing tigbantay batok sa posibleng pag-abuso sa proseso. Gihangyo ni Lacson ang maong mga grupo nga dili lamang magmonitor kondili ipahibalo usab sa publiko ang mga kadudahang lihok aron mapanubag ang mga responsable.
