Unahon sa Department of Education (DepEd) ang mga magtutudlo sa pampublikong eskwelahan nga wala pa makadawat og laptop gikan sa gobyerno o sa ilang eskwelahan.
Magsugod sa Nobyembre 9 ang pag-apod-apod sa 231,725 ka laptop ubos sa programang Laptops for Teachers o L4T, nga naglangkob sa 169,008 ka Mac-based ug 62,717 ka Windows-based units.
Matod ni Education Secretary Sonny Angara, nagtakda na ang ahensya og mga sukdanan sa pagpili sa mga benepisyaryo aron maseguro nga mahatag ang mga laptop sa mga magtutudlo nga mas nanginahanglan niini.
Unang hatagan og prayoridad ang mga eskwelahan nga wala pa makabenepisyo sa maong programa, ilabi na ang mga magtutudlo nga wala pa makadawat og laptop gikan sa bisan unsang programa sa gobyerno o donasyon.
Lakip usab sa mahimong makadawat ang mga magtutudlo nga nadaot o nawad-an og laptop tungod sa kalamidad o pagpangawat.
Dili usab basihan sa pagpili ang gidugayon sa ilang serbisyo isip magtutudlo.
Samtang, gisugo ang mga school principal ug property custodian nga isumite ang listahan sa mga benepisyaryo pinaagi sa TALA platform sa dili pa o sa Nobyembre 15.
Giklaro sa DepEd nga magpabiling pagpanag-iya sa gobyerno ang mga laptop ug kinahanglan kining iuli kon mabalhin ang magtutudlo sa posisyon nga dili na manginahanglan sa maong kagamitan.
