Nangayo og pasaylo si House Deputy Speaker Ronaldo Puno human niya tawga og “ignorante” ang mga nagpakuwestiyon sa nasudnong badyet atol sa pakigpulong sa liderato sa National Unity Party o NUP ngadto sa People’s Budget Coalition o PBC.
Sumala sa PBC, ilang gidawat ang pagpangayo og pasaylo ni Puno kalabot sa iyang nangaging mga pahayag batok sa mga kritiko sa 2027 National Budget.
Sa maong tigum niadtong Nobyembre 5, gihisgotan usab ang importante nga papel sa mga budget advocate sa paghimog ug pagsusi sa nasudnong badyet.
Giila usab umano sa NUP nga adunay kakulang ang Kamara sa paghatag og kahigayonan sa mga “civil society organizations” ug “budget watchdog” nga makaapil sa mga diskusyon kalabot sa gisugyot nga badyet.
Matod sa PBC, usa sa mga hinungdan niini ang politikal nga sitwasyon nga giatubang sa partido ug ang tinguha nga dili malangan ang pagpasa sa nasudnong badyet. Naglaum usab ang NUP nga matul-id pa ang mga kakulang panahon sa bicameral conference committee.
Apan gipadayag sa PBC nga magpabilin ang responsibilidad sa mga kongresista nga mibotar pabor sa panukala nga siguruhong husto ang mahimong bersiyon sa 2027 budget ug malikayan ang pagbalik sa mga kontrobersiya sama sa flood control scandal.
Nahinumduman nga nahimong kontrobersiyal ang pahayag ni Puno human niya tawga og “ignorante” ang mga nagbatikos sa nasudnong badyet. Padayon usab nga gipangayo sa PBC ang mas lapad nga partisipasyon sa publiko ug pag-abli sa mga dokumento sa badyet aron masuta kung giunsa paggahin ang pondo sa katawhan.
