Gidayeg sa Office of Civil Defense o OCD ang mga lokal nga panggamhanan ug publiko tungod sa malampusong pag-apil sa Nationwide Simultaneous Earthquake Drill o NSED kagahapon Nobyembre 5.
Gipahigayon usab kini dungan sa pag-obserbar sa World Tsunami Awareness Day aron mapalig-on ang kahibalo ug kahandam sa katawhan batok sa mga kalamidad.
Matud sa OCD, padayon nga nagkadaghan ang mga miapil sa maong kalihokan, lakip na ang mga ahensya sa gobyerno ug mga pribadong korporasyon.
Gipunting sa drill ang hustong pagbuhat sa “Duck, Cover, and Hold” aron maanad ang mga tawo sa angay nga lihok panahon sa kusog nga linog.
Gisulayan usab ang komunikasyon, koordinasyon ug kalig-on sa proseso sa pagbakwit pinaagi sa nagkalainlaing simulation, ilabina sa mga komunidad nga duol sa baybayon ug delikado sa tsunami.
Tumong niini nga masuta ang mga kakulangan sa disaster response plans sa nasud.
Giawhag usab sa OCD ang matag pamilya nga magplano sa hustong pagbakwit, mag-ila sa luwas nga tigumanan ug hisgutan sa matag panimalay ang mga lakang aron masiguro ang kaluwasan sa tanan panahon sa kalamidad.
