Gipadayag ni kanhi Senador Antonio Trillanes IV ang iyang pagduda nga posibleng nakaapekto sa operasyon sa pagdakop kang Senador Ronald “Bato” Dela Rosa ang sunod-sunod nga press conference ni Interior Secretary Jonvic Remulla.
Sa usa ka eksklusibong interbyu sa Bombo Radyo Philippines, miingon si Trillanes nga, sumala sa iyang nakuha nga impormasyon, anaa sa Davao Region si Dela Rosa.
Apan, nagduda siya nga ang kanunay nga pagpagawas og impormasyon ngadto sa publiko posibleng nakahatag og pasidaan sa kampo sa senador bahin sa mga lihok sa mga awtoridad.
Gisaway usab sa kanhi senador ang P50 Million nga reward money, nga matod niya, gipahibalo sa publiko imbes nga ipatuman sa mas confidential nga paagi.
Nagtuo usab si Trillanes nga anaa pa sa Mindanao si Dela Rosa, nga giisyu-an og warrant of arrest sa International Criminal Court (ICC) may kalabotan sa kasong crimes against humanity.
Sa pagkakaron, wala pa magpagawas og opisyal nga pahayag ang mga awtoridad bahin sa eksaktong nahimutangan sa senador.
