Nanumpa na isip ika-28 nga Chief Justice sa Korte Suprema si Associate Justice Rodil V. Zalameda atol sa oath-taking ceremony nga gihimo sa Supreme Court En Banc session hall karong adlawa sa hapon, Nobyembre 6.
Gipangulohan ni Senior Associate Justice Marvic Leonen ang pagpahigayon sa panumpa ni Zalameda human siya pormal nga itudlo ni Pangulong Ferdinand Marcos Jr. sa maong posisyon.
Ilisan ni Zalameda si kanhi Chief Justice Alexander Gesmundo nga pormal nang miretiro karong adlawa human mahuman ang iyang termino sa Korte Suprema.
Una siyang nahimong Associate Justice sa Korte Suprema niadtong Agosto 6, 2019 human itudlo ni kanhi Presidente Rodrigo Duterte.
Sulod sa 11 ka tuig, nagsilbi usab si Zalameda isip Associate Justice sa Court of Appeals diin nahimo siyang presiding justice sa 17th Division, samtang nakaagi usab siya sa lain-laing posisyon sa hudikatura ug sa public prosecution.
Nagtapos siya og Bachelor of Laws sa Ateneo de Manila University niadtong 1987 ug nakapasar sa Bar Examinations niadtong 1988.
