Miabante na sa quarterfinals sa 2026 Hong Kong Open ang Filipina tennis star nga si Alexandra Eala human mapildi ang Czech Republic player nga si Tereza Valentova sa Round of 16 ning adlaw nga, Huwebes.
Natapos ang duwa sa iskor nga 6-4, 7-6 (9-7) pabor kang Eala human sa usa ka oras ug 54 minutos nga panag-indigay.
Sa unang set, dali nga nakalabaw si Eala sa iskor nga 3-0, apan nakabawi si Valentova ug natabla ang dula sa 4-4. Bisan pa niini, nagpabiling lig-on ang Filipina tennis star ug nakuha ang unang set sa iskor nga 6-4.
Sa ikaduhang set, si Valentova na usab ang nanguna human makalamang sa 4-2. Apan nakaapas si Eala ug natabla ang iskor sa 5-5, hinungdan nga miabot ang dula sa tiebreak.
Nakalamang si Eala og 5-0 sa tiebreak, apan nakabawi pa si Valentova ug naluwas ang tulo ka match points. Sa katapusan, gipabilin ni Eala ang iyang kalig-on ug midaog sa iskor nga 9-7 aron maselyohan ang iyang kadaugan.
Sa quarterfinals, atubangon ni Eala si Antonia Ruzic karong Biyernes alang sa puwesto sa semifinals sa torneyo.
