Gimando ni Bureau of Jail Management and Penology (BJMP) Chief JDIR Efren Nemeño ang dihadiha nga imbestigasyon sa giingong sekretong paggawas ni kanhi House Speaker Martin Romualdez sa New Quezon City Jail, subay sa alegasyon sa beteranong kolumnista nga si Mon Tulfo.
Matud sa BJMP sa ilang pahayag karong Miyerkules, seryoso nilang gitagad ang maong alegasyon ug gimando ni Nemeño niadtong Nobyembre 3, 2026 ang gilayon nga imbestigasyon.
Base sa inisyal nga pagsusi sa CCTV sa BJMP National Headquarters, walay naitalang power interruption o pagkaputol sa CCTV sa Quezon City Jail Male Dormitory.
Wala usab kunoy naitalang paglihok ni Romualdez sa gawas sa pasilidad sa panahon nga ilang gisusi.
Giklaro sa BJMP nga nagpadayon ang imbestigasyon ug gipasiugda nga parehas ang mga lagda sa kustodiya nga ipatuman sa tanang persons deprived of liberty o PDL, diin gikinahanglan ang hustong mando sa korte sa dili pa tugotan ang bisan kinsang piniriso nga mogawas sa prisohan.
Dugang pa sa ahensya, andam silang modawat og may kalabutan nga impormasyon gikan sa publiko ug makigtambayayong sa bisan unsang imbestigasyon nga ipahigayon sa ubang ahensya sa gobyerno.
