Posibleng molungtad og duha ka tuig o labaw pa ang pagtaral sa International Criminal Court (ICC) batok kang kanhi Pangulong Rodrigo Duterte.
Nakatakdang magsugod ang maong trial sa Nobyembre 30, kapin 20 ka bulan human gidakop ang kanhing pangulo dinhi sa Pilipinas.
Matud ni ICC-accredited lawyer Atty. Gilbert Andres, mahimo pang mub-an o molungtad og mas dugay ang paglilitis depende sa dagan sa mga hearing, sa kapaspas sa pagpresentar sa mga testigo, ug sa mga ebidensiyang ipadayag sa duha ka kampo.
Si Atty. Andres usa sa mga common legal representative sa mga biktima sa drug war atol sa miaging administrasyon. Matud pa kaniya, importante ang desisyon sa international tribunal nga mandoan ang kanhing pangulo nga personal nga moatubang sa pagtaral
Gilauman usab nga personal nga motambong ug mosubay sa sunod-sunod nga hearing sa The Hague, nga nahimutangan sa headquarters sa ICC, ang pipila ka mga paryente sa mga biktima.
Matud ni Atty. Andres, usa lamang ka matang sa international crime ang giatubang nga kaso sa kanhing pangulo sa Pilipinas, hinungdan nga mas sayon o simple kini kumpara sa ubang mga kasong nahawiran na kaniadto sa international tribunal.
Samtang, inig sugod sa trial sa Nobyembre 30, gilauman nga basahan dayon ang kanhing pangulo sa mga kumpirmadong kaso batok kaniya ug pangutan-on kung unsa ang iyang plea o tubag sa mga alegasyon.
Sunod niini ang opening statements gikan sa prosecution, sa mga legal representative sa mga biktima sa drug war, ug sa defense team sa kanhing pangulo.
Human niini, ipresentar sa prosecution ang ilang unang lima ka testigo gikan Nobyembre 30 hangtod Disyembre 18, 2026.
