Gilimod sa Philippine National Police o PNP ang panawagan nga gamiton ang “shoot-to-kill” approach sa pagpatuman sa warrant of arrest batok kang Senador Ronald “Bato” Dela Rosa.
Matud ni PNP Chief General Jose Melencio Nartatez Jr., katungdanan lamang nila ang pagpatuman sa balaod ug dili ang paglihok nga supak niini.
Gipadayag niya nga kinahanglan sundon sa tanang operasyon ang due process, tawhanong katungod ug rule of law.
Kini human mikaylap sa social media ang mga peke nga ‘quote card’ nga nag-angkon nga nanawagan si Cagayan de Oro Representative Lordan Suan nga gamiton ang “shoot-to-kill” batok sa senador.
Gilimod kini ni Suan ug gipaklaro nga wala siya naghimo og maong pahayag.
Samtang, gimandoan ni Nartatez ang mga police unit nga ipadayon ang ‘intelligence gathering’ ug ‘monitoring’ aron masuta ang nahimutangan ni Dela Rosa nga giatubang ang ‘warrant of arrest’ may kalabotan sa kasong ‘crimes against humanity’ sa International Criminal Court o ICC.
Adunay gitagana nga P50 million nga ganti alang sa impormasyong makatabang sa pagdakop sa senador.
