Gisugdan sa Pinay tennis star ug kasamtangang World No. 17 sa WTA nga si Alex Eala pinaagi sa kadaugan ang iyang kampanya sa Hong Kong Open human gipildi ang Australian player nga si Emerson Jones sa iskor nga 6-4, 6-3, sa Round of 32 ning, Martes sa Victoria Park Tennis Stadium.
Nakatakda dapat nga makigsangka si Eala kang American player Alycia Parks, apan miatras kini sa torneyo sa wala pa ang ilang dula. Tungod niini, gipulihan siya ni Jones isip lucky loser human mapildi sa qualifying round.
Gipakita dayon ni Eala ang iyang agresibong pagdula sa unang set diin nakalamang siya sa iskor nga 3-0. Apan nakabawi si Jones pinaagi sa sunod-sunod nga service breaks aron makaduol sa iskor sa Pinay tennis star.
Bisan pa niini, napabilin ni Eala ang iyang bentaha ug nakuha ang unang set sa iskor nga 6-4. Mas nakontrola pa niya ang ikaduhang set human nakahimo og importanteng breaks ug nakalamang sa iskor nga 4-1.
Bisan nakabawi pa si Jones, wala tugoti ni Eala nga madala pa sa deciding set ang ilang dula ug gitapos kini sa iskor nga 6-3.
Sa pag-abante ngadto sa Round of 16, sunod nga atubangon ni Eala si Tereza Valentova sa Czech Republic, diin adunay 2-0 nga bentaha si Eala sa ilang head-to-head record sa WTA Tour.
