Magpatuman og full-scale earthquake ug tsunami simulation ang Office of Civil Defense Region 12 o OCD-12 sa munisipalidad sa Kiamba, Sarangani Province sa Nobyembre 5, sugod alas 9:00 sa buntag, isip kabahin sa 4th Quarter Nationwide Simultaneous Earthquake ug Tsunami Drill.
Matud ni Beverly Anne Snatos, spokesperson sa OCD-12, gipili ang Kiamba isip host local government unit tungod kay usa kini ka coastal municipality nga posibleng maapektuhan sa tsunami.
Kabahin usab sa maong kalihokan ang pag-obserbar sa World Tsunami Awareness Day aron mapalambo ang kahibalo ug kahandam sa katawhan batok sa linog ug tsunami.
Sugdan ang drill pinaagi sa ceremonial pressing of the button nga pangulohan sa OCD-12, kauban ang mga regional partner agencies ug si Kiamba Mayor George Falgui.
Human niini, ipakita ang hustong pagtubag sa linog pinaagi sa Duck, Cover and Hold, nga sundan sa pagbakwit ngadto sa mga gitakdang open space o evacuation areas.
Magpahigayon usab og debriefing ug evaluation human sa simulation aron matino ang mga kakulangan ug mga bahin nga kinahanglan pang pauswagon sa disaster preparedness ug response sa mga ahensya ug komunidad.
