Gidasig sa Office of Civil Defense Region 12 ang publiko nga maghimo daan og contingency plan ug mangandam alang sa posibleng worst-case scenario panahon sa linog ug tsunami.
Matud ni Beverly Anne Snatos, spokesperson sa OCD-12, kinahanglan nga adunay daan nga plano ang matag pamilya kon asa moadto ug unsay buhaton panahon sa emerhensya, ilabina human sa nasinati nga magnitude 7.8 nga linog niadtong Hunyo diin nagpagawas usab og tsunami advisory.
Gipahinumdoman usab ang mga residente nga dili na maglangan sa pagbakwit kon adunay opisyal nga tsunami advisory o makamatikod nga adunay dili normal nga lihok sa dagat ug palibot.
Gikinahanglan nga mokadto dayon sa mas taas ug luwas nga lugar o sa gitakdang evacuation area nga dili na maghulat pa sa dugang nga pahibalo.
Dugang pa ni Snatos, importante usab ang kanunay nga pagsubay sa opisyal nga impormasyon gikan sa PHIVOLCS ug Office of Civil Defense pinaagi sa ilang mga social media page aron malikayan ang pagsalig sa dili kumpirmadong impormasyon.
