Kulang gihapon ang suplay sa dugo bisan paman sa presensya sa mga regular nga blood donors tungod sa taas nga panginahanglan sa mga pasyente nga nagkinahanglan og blood transfusion.
Matud ni Merly Gludo, Chapter Administrator sa Philippine Red Cross – Sarangani General Santos (PRC-SarGen), ilabina nga nagkinahanglan og dugo ang mga pasyenteng nakasinati og grabeng pagdugo.
Kabahin niini, nag-andam ang PRC-SarGen sa pagpatigayon og bloodletting activity sa Nobyembre 14 sa Robinsons Place General Santos isip kabahin sa Dugong Bombo 2026.
Gilauman nga pinaagi sa maong kalihokan, madugangan ang suplay sa dugo nga magamit sa mga pasyenteng nanginahanglan niini.
Gawas sa pagdonar og dugo, mahimo usab nga motabang ang mga dili kwalipikadong donors pinaagi sa pagdapit sa ubang kwalipikadong modonar ug paghatag og pagkaon alang sa mga blood donors.
Busa, gilauman ni Gludo ang pagtinabangay sa katawhan sa General Santos City, Sarangani Province ug kasikbit nga mga lugar aron makatabang sa pagluwas sa kinabuhi sa ilang isigkatawo.
