Mga laray vendor sa Gensan, dili apil sa opisyal nga relokasyon apan hatagan og prayoridad sa bag-ong public market

Dili apil sa opisyal nga ihap sa mga vendor nga sakop sa relokasyon ang mga laray o ambulant vendors sa pampublikong merkado tungod kay wala sila’y opisyal nga lease agreement o kontrata sa lokal nga gobyerno.

Matud ni City Administrator Shandee Pestaño, bisan dili sila sakop sa opisyal nga relokasyon, gitugotan gihapon sila nga magbaligya sa gitakdang lugar ug oras aron makapadayon sa ilang panginabuhi ug makatabang sa ilang adlaw-adlaw nga panginahanglan.

Gihangyo usab sa opisyal ang pagsabot sa mga vendor sa pagpatuman sa gitakdang oras sa ilang pagpaninda.

Dugang pa ni Pestaño, kung mahuman na ang pagtukod sa bag-ong public market, hatagan og prayoridad ang mga laray vendor nga gustong mokuha og opisyal nga pwesto sa maong merkado.