Plano sa administrasyon ni US President Donald Trump nga i-deport ang kapin 150 ka Afghan immigrants pabalik sa ilang gigikanang nasud nga Afghanistan pinaagi sa Pakistan.
May kalabotan kini sa travel ban nga gipahamtang ni Trump batok sa pipila ka nasud, lakip na ang Afghanistan, isip kabahin sa kampanya sa iyang administrasyon batok sa mga langyaw nga nagpuyo o misulod sa US nga walay legal nga dokumento.
Tumong usab sa maong mando nga tapuson ang deportation protection nga gihatag sa mga Afghan, diin ang pipila kanila gihatagan na kaniadto og special immigrant visa human makuha sa pwersa sa Taliban ang kontrol sa ilang nasud niadtong 2021.
Lakip usab sa mga gikatakdang i-deport ang mga kapamilya sa mga Afghan nga mitabang sa militar sa US sa wala pa mabihag sa Taliban ang Kabul, sumala sa Afghan group nga AfghanEvac.
Bisan dili direktang mapabalik sa US ang mga Afghan ngadto sa Afghanistan, makig-alayon kini sa Pakistan aron dumalahan ang ilang deportasyon pabalik sa ilang nasud.
May kalabotan usab kini sa nagkagrabeng relasyon tali sa Pakistan ug Afghanistan human makontrolar sa Taliban ang Kabul.
Tungod niini, gipatuman sa Islamabad ang repatriation policy batok sa mga Afghan citizen nga nagpuyo sa Pakistan nga walay visa.
Gikatakdang molupad sa Lunes ang unang flight nga magdala sa maong mga immigrants.
