Nakapatay og 3,560 ka tawo sa Indonesia ang makahilong aso gikan sa sunog sa kalasangan ug yuta niadtong milabayng Septyembre, base sa taho sa Centre for Research on Energy and Clean Air o CREA.
Dugang sa mga namatay tungod sa sunog, laing 1,750 ka tawo ang namatay tungod sa polusyon sa hangin gikan sa mga siyudad ug industriya.
Miabot usab sa 58 milyones ka tawo ang naladlad sa dili himsog hangtod sa delikadong hangin tungod sa aso.
Gipasanginlan ang grabeng hulaw nga nalambigit sa El Niño sa pagkaylap sa sunog ug makahilong aso sa Indonesia ug silingang mga nasud, lakip ang Pilipinas.
Samtang, gipadayag sa gobyerno sa Indonesia nga nagdeploy sila og kapin sa 72,000 ka personahe aron palongon ang sunog ug nagpang-apod-apod og 5.3 milyones ka face mask ngadto sa mga apektadong residente.
