Nakuha ni Abdulraof “Sammy Gambar” Macacua ang posisyon isip bag-ong Chief Minister sa Bangsamoro Autonomous Region in Muslim Mindanao (BARMM) human makakuha og 51 ka boto sa eleksyon sa Bangsamoro Parliament ning Biyernes, Oktubre 30, 2026.
Nahabilin sa 27 ka boto ang iyang kaatbang nga si kanhi interim Chief Minister Ahod “Al Haj Murad” Ebrahim, samtang adunay usa nga nag-abstain sa botohan.
Ang maong eleksyon nagtimaan sa pagtapos sa pito ka tuig nga transition governance sa rehiyon ug sa pagbalhin gikan sa Bangsamoro Transition Authority ngadto sa regular nga rehiyonal nga panggamhanan ubos sa Bangsamoro Organic Law.
Si Macacua kanhi nagsilbi isip Chief of Staff sa Bangsamoro Islamic Armed Forces sa Moro Islamic Liberation Front o MILF ug nahimong kabahin sa proseso sa kalinaw sa Mindanao.
Mitambong usab sa maong kalihukan ang mga opisyal sa national government, mga gobernador, peace advocates ug mga langyawng diplomat nga misaksi sa pagpalingkod sa mga regular nga miyembro sa Parlamento.
Samtang, nagpatuman og hugot nga seguridad ang kapulisan ug militar sa Cotabato City atol sa maong kalihukan, nga miresulta sa temporaryong limitasyon sa paglihok ug operasyon sa pipila ka establisemento.
