GENSAN-Personal nga gibisita ug gi-inspeksyon ni General Santos City Police Office City Director Police Colonel Ariel Acala ang Bulaong Terminal aron susihon ang kahimtang sa pasilidad ug ang pagpangandam sa seguridad alang sa umaabot nga Undas 2026.
Kabahin kini sa lakang sa kapulisan aron masiguro ang kalinaw ug kahapsay, ilabina sa mga terminal ug mga lugar nga gilauman nga daghang tawo ang magtapok tungod sa pagbiyahe sa mga pasahero padulong sa ilang tagsa-tagsa ka probinsya ug lungsod aron sa paghinumdom sa ilang mga minahal nga namatay.
Matud ni PCol. Acala, kapin sa 200 ka mga personnel sa kapulisan ang ideploy sa nagkadaiyang lugar sa siyudad atol sa kalag kalag aron pagpalig-on sa police visibility ug pagmintinar sa seguridad.
Gawas sa mga terminal, gilauman usab nga magbutang og police assistance desks ug magpahigayon og regular nga pagpatrolya sa mga sementeryo, simbahan, highway ug uban pang mga lugar nga gilauman nga daghan ang mga tawo.
Tumong sa maong pagpangandam nga malikayan ang mga insidente sa krimen ug aksidente ug masiguro nga malinawon, luwas ug hapsay ang pag-obserbar sa All Saints og All Souls Day sa dakbayan sa General Santos.
