GENSAN- Nagpagawas na og draft tentative schedule ang Commission on Elections (COMELEC) Region 12 alang sa voter registration nga giplanong ipahigayon gikan Nobyembre 9 hangtod Hulyo 30, 2027.
Matud ni Atty. Jose Villanueva, assistant regional director sa COMELEC Region 12, nag-agad pa sa pag-apruba sa COMELEC en banc ang maong eskedyul, busa gihulat pa ang pinal nga pahibalo sa poll body.
Gipahinumdoman usab ang mga bag-ong botante nga mag-andam og balidong ID ug photocopy niini, lakip ang birth certificate aron mapamatud-an ang ilang edad sa pagparehistro.
Mahimong i-download daan ang registration form sa opisyal nga website sa COMELEC nga comelec.gov.ph.
Matud ni Villanueva, usa na lamang ka kopya sa form ang kinahanglan nga sulatan, dili sama kaniadto nga tulo ka kopya ang gikinahanglan.
Dugang pa niya, dili lamang ang mga bag-ong botante ang mahimong magparehistro kay mahimo usab nga magpa-correction of entries ang mga rehistradong botante ug magpausab sa ilang voter status, sama sa pagbalhin gikan sa ordinaryong botante ngadto sa senior citizen category, kon angay na kanila.
