GENSAN- Magpatuman og full-scale earthquake-tsunami exercise ang Regional Disaster Risk Reduction and Management Council (RDRRMC-12) kauban ang lokal nga pangagamhanan sa Kiamba, Sarangani Province sa Nobyembre 5, 2026, alas-9 sa buntag isip kabahin sa Fourth Quarter Nationwide Simultaneous Earthquake Drill (NSED).
Gibutyag ni Office of Civil Defense (OCD-12) Regional Director ug RDRRMC-12 Chairperson Rodrigo O. Sosmeña nga ang Kiamba maoy pilion nga lugar alang sa maong ehersisyo.
Matod ni Sosmeña, sulayan niini ang kapasidad sa mga lokal nga pangagamhanan sa water search and rescue, ingon man ang aktuwal nga pagbalhin sa mga tawo gikan sa dagat ug baybayon ngadto sa luwas nga lugar ug medical facility kon adunay linog nga mosangpot sa tsunami.
Dugang pa niya, susihon usab ang koordinasyon sa nagkadaiyang lokal nga pangagamhanan ug sa tibuok probinsya aron masiguro ang tukmang pagtabang sa mga lugar nga posibleng maapektuhan sa kalamidad.
Samtang, ipataas sa RDRRMC-12 ngadto sa Blue Alert ang alert status niini ug aktibahon ang Emergency Operations Center (EOC) gikan Oktubre 31 hangtod Nobyembre 2, 2026, isip pagpangandam sa pagsaulog sa Kalag-kalag ug padayon nga pagbantay sa posibleng epekto sa El Niño.
