Gipangandaman ni North Korean leader Kim Jong Un ang militar sa maong nasud alang sa posibleng gubat.
Gimandoan ni Kim ang mga commander sa Korean People’s Army nga siguruhon nga andam ang matag yunit sa pagpakiggubat.
Gipagawas sa state-run media nga Korean Central News Agency (KCNA) ang maong pahayag human mitambong si Kim sa usa ka kalihokan uban sa mga opisyal sa militar sa North Korea.
Base sa gipagawas nga pahayag, gimandoan matod pa ni Kim ang matag ‘company leader’ nga mangandam alang sa gubat, diin usa sa mga nag-unang paagi niini mao ang hugot ug halapad nga pagbansay sa tanang sundalo.
Sa wala pa kini, gipahigayon ang Third Meeting of Company Leaders tali ni Kim ug sa mga lider sa militar sa maong nasud. Nahitabo kini sa Pyongyang niadtong Oktubre 22 ug 23, 2026.
Atol sa maong tigom, gimandoan usab ni Kim ang mga commander nga magtukod og labing kusgan nga kasundalohan ug paspason ang ‘Korean-style military revolution’ pinaagi sa pagbansay sa labing lig-on nga mga yunit o kompanya sa militar.
Matod sa state-run media sa North Korea, kini ang unang higayon nga gitigom ang tibuok kasundalohan sa maong nasud sukad sa ‘Ninth Congress of the Workers’ Party’ niadtong Pebrero.
