Nagapangayo ang Sugar Regulatory Administration (SRA) sa gobyerno nga magpatuman og mas ubos nga buhis sa mga ‘sugary drinks nga naggamit og lokal nga tubo isip sangkap aron matabangan ang mga mag-uuma sa Pilipinas.
Sumala sa SRA, kinahanglan magpabilin sa unom ka pesos kada litro ang buhis sa mga sweetened beverages nga naggamit og lokal nga asukal.
Samtang, mas taas nga buhis ang girekomendar alang sa mga ilimnon nga naggamit og artificial sweeteners o uban pang imported nga mga sweetener.
Matod sa SRA, ang pagpaubos sa buhis mahimong makadasig sa mga kompanya nga mogamit og lokal nga asukal ug makatabang sa pagsiguro sa padayon nga panginahanglan sa produkto sa mga mag-uuma.
Nahinumdoman nga gisugyot sa Department of Finance (DOF), pinaagi sa ProGRESS bill, ang pagpataas sa buhis sa mga matam-is nga ilimnon ngadto sa 20 pesos kada litro aron madugangan ang pondo alang sa mga serbisyo publiko ug kalamboan sa nasud.
Apan, nakig-alayon ang SRA nga makigsabot sa DOF aron magpabilin sa unom ka pesos kada litro o gamay lamang ang pagpataas sa buhis, samtang likayan ang dakong pagsaka sa presyo sa mga ilimnon nga mahimong mabug-at sa mga konsumidor.
