GENSAN- Padayon pang giimbestigahan sa kapulisan ug Bureau of Fire Protection o BFP-Gensan ang hinungdan sa dakong sunog nga miigo sa ukay-ukayan sa Prk. Islam Brgy. Dadiangas South niadtong miaging gabii, Oktubre 25.
Sumala ni Police Lieutenant Rico Edralin,Deputy Station Commander sa Bula Police Station nga mokabat sa 30 ka mga balay ang naapektuhan sa sunog, samtang gibanabana sa kapin P1.7 milyon ang kantidad sa damyos.
Gikumpirma usab ni Edralin nga walay natalang nasamdan sa maong insidente. Sa pagkakaron, anaa sa gym sa Barangay Dadiangas South ang mga residenteng naapektuhan sa sunog samtang naghulat sa sunod nga mga lakang human sa insidente.
Gibutyag ni Edralin nga adunay person of interest sa nahitabong sunog nga giila lamang sa alyas “Yu” og giimbestigahan sa kapulisan ang nasampit, apan wala pa kini makumpirma nga maoy responsable sa insidente.
Matod pa sa opisyal, giimbita lamang ang maong indibidwal alang sa dugang nga imbestigasyon samtang nagpadayon ang pag-susi sa BFP sa tinuod nga hinungdan sa sunog.
