Nagpakalat ang Police Regional Office 12 o PRO 12 og 4,790 ka personahe aron masiguro ang kalinaw ug seguridad sa tibuok rehiyon sa SOCCSKSARGEN atol sa pagsaulog sa Undas 2026.
Ubos sa pagpangulo ni PRO 12 Regional Director PBGEN Alan B. Manibog, magbutang og mga personahe sa 125 ka sementeryo, 21 ka memorial park ug usa ka columbarium sa rehiyon.
Gilangkuban ang ipakatap nga mga personahe sa 2,766 ka miyembro sa Philippine National Police, 664 gikan sa ubang mga yunit ug 1,360 ka force multiplier nga naglakip sa mga miyembro sa Barangay Peace Action Teams, mga personahe sa lokal nga kagamhanan ug mga traffic enforcer.
Magbutang usab ang PRO 12 og 152 ka Police Assistance Desk o PAD sa mga sementeryo ug columbarium aron motabang sa publiko ug motubag sa mga panginahanglanon sa seguridad.
Gipasalig ni Manibog nga makigtambayayong ang kapulisan sa mga lokal nga kagamhanan ug ubang ahensya aron masiguro ang malinawon ug hapsay nga pagsaulog sa Undas.
Giawhag usab niya ang publiko nga makigtambayayong sa mga pulis, mosunod sa mga pahimangno ug motaho dayon sa bisan unsang kadudahang kalihokan aron mapanalipdan ang kaluwasan sa tanan.
