SARANGANI- Gipasalig sa provincial government sa Sarangani ang padayon nga pagpanalipod sa katungod, kultura ug kaayohan sa mga Lumad atol sa ika-29 nga Provincial Indigenous Peoples’ Day ug paghandum sa Indigenous Peoples’ Rights Act o IPRA Law, miaging adlaw, Oktubre 23 sa Barangay Lun Masla, Malapatan.
Gipadayag ni Governor Rogelio D. Pacquiao ang responsibilidad sa pangagamhanan sa pagpanalipod sa mga yutang kabilin ug pagrespeto sa kultura sa mga Lumad, samtang giawhag ang mga lider sa tribu ug mga tigulang nga sulbaron ang panagbangi pinaagi sa malinawon nga dayalogo ug hustong pagpataliwala.
Matod ni Pacquiao, ang kultura ug tradisyon angay mahimong giya sa pagpanalipod sa kinabuhi, samtang gpunting ni Malapatan Mayor Salway Sumbo Jr. nga ang mga naandan nga pamaagi nga makadaot sa tribu kinahanglan undangon.
Pinaagi sa Ronda Probinsya–Sarangani Indigenous Peoples Resiliency and Advancement Program o RP-SIPRA, gipadayon sa probinsya ang pagpalig-on sa suporta sa mga institusyon sa Lumad ug pagpalapad sa mga oportunidad sa panginabuhian ug edukasyon.
Mitambong sa kalihokan ang mga Blaan, Tboli ug Tagakaulo, uban ang mga lider sa tribu, mga tigulang, representante sa Lumad ug mga opisyal sa National Commission on Indigenous Peoples o NCIP ug lokal nga pangagamhanan.
