Posibleng mosaka ang presyo sa kape sa Pilipinas sa bulan sa Disyembre ug magpadayon kini hangtod sa unang quarter sa tuig 2027 tungod sa kakulang sa suplay.
Matod sa Philippine Coffee Board Inc., ang posibleng pagsaka sa presyo sa kape gipahinabo sa kakulang sa suplay sa global market, pagkalangan sa mga shipment gikan sa mga nasud nga nagprodyus og kape, ug pagkunhod sa ani.
Gilauman nga mas mabati ang pagsaka sa presyo sa gagmay nga mga coffee shop nga adunay limitado nga kapital.
Tungod usab sa kakulang sa suplay gikan sa Brazil, nangita na ang mga negosyante og laing tinubdan sa coffee beans, lakip na ang lokal nga kape, bisan og mas mahal kini kaysa sa pipila ka imported nga produkto.
Gilauman usab nga mokunhod ngadto sa 30,000 metric tons ang produksyon sa kape sa Pilipinas karong tuiga, kumpara sa kapin 35,000 metric tons niadtong 2025, tungod sa nagkataas nga gasto sa pagpanguma ug sa epekto sa El Niño.
Samtang, gipahayag sa Department of Agriculture (DA) nga nag-andam kini og mga lakang sama sa mas maayong pagdumala sa tubig ug paghatag og tukmang mga panginahanglanon sa pagpanguma aron matabangan ang mga mag-uuma.
