Nanawagan si Senate President Sherwin Gatchalian sa mga otoridad nga siguruhon nga madakpan si Senador Ronald “Bato” dela Rosa aron malikayan ang kapintasan ug posibleng kaswalti sa mga sibilyan ug operatiba.
Sa usa ka interbyu, si Gatchalian niingon nga importante nga masiguro ang kaluwasan ni Dela Rosa ug sa mga law enforcers nga maoy mopahigayon sa operasyon, tungod kay delikado ang maong matang sa pagpatuman sa balaod.
Gipahayag niya nga ang pagdakop kinahanglan nga buhaton sa husto, ilabi na human sa mga pamahayag sa Department of the Interior and Local Government (DILG) nga ang operasyon mahimong mosangpot sa kapintasan.
Matod pa ni Interior Secretary Jonvic Remulla nga moabot ngadto sa 10,000 ka mga tawo ang posibleng mamatay kon pugsanon nga dakpon si Dela Rosa.
Tungod niini, matod ni Remulla, nakigsabot ang gobyerno aron madani ang senador nga mo-surrender.
Hinuon giinsister ni Gatchalian nga kinahanglang ipatigbabaw sa gobyerno ang awtoridad niini atubangan sa taho nga dunay armadong grupo nga giingong nagsuporta kang Dela Rosa.
Una nang niingon ang Senate President nga dili angayan nga makigsabot ang gobyerno sa mga armadong grupo nga walay awtorisasyon sa pagdala og armas, ilabi na kon sakop sila sa mga kriminal o teroristang grupo.
Matod niya, mahimong huyang ang pagtan-aw sa gobyerno kon makigsabot kini sa mga grupo nga angay unta ubos sa balaod.
Hinuon giklaro ni Gatchalian nga wala siya masayod sa tibuok detalye bahin sa grupo nga giingong nanalipod sa senador.
Nasabtan usab niya kung ngano nga gipugngan sa mga awtoridad ang pipila nga kasayuran tungod sa mga konsiderasyon sa seguridad.
Kahinumdoman nga ang gobyerno nipahibawo na og P50-million nga reward sa pagtabang sa pagdakop kang Dela Rosa, samtang ang Philippine National Police mihatag kaniya og usa ka semana aron mo-surrender.
Si Dela Rosa nag-atubang og warrant of arrest gikan sa International Criminal Court kalabot sa giingong mga krimen batok sa katawhan sa anti-drug campaign sa administrasyon ni kanhi Presidente Rodrigo Duterte.
Sa laing bahin, si Gatchalian niingon nga wala siya’y nadawat nga komunikasyon gikan ni Dela Rosa, lakip na ang posibleng hangyo nga ibutang siya sa kustodiya sa Senado.
Katapusan nilang panag-estorya dihang mitunga ang senador sa Senado niadtong Mayo.
