Giplano sa Department of Agriculture kon DA ang posibleng pagsuspenso sulod sa 60 ka adlaw sa pag-isyu sa Sanitary and Phytosanitary Import Clearances kon SPSIC alang sa pipila ka klase sa gi-import nga karne sa baboy.
Matod ni Agriculture Secretary Francisco Tiu Laurel Jr., posibleng sakop sa maong suspensiyon ang ‘liempo’, ‘kasim’ ug ‘pigue’. Apan, gipasabot niya nga sa tunga-tunga pa sa Nobyembre mahimong legal nga ipatuman ang maong restriksiyon.
Gihimo sa ahensya ang maong lakang human gisugdan ang imbestigasyon sa ‘preliminary safeguard measures’ batok sa mga gina-import nga karne sa baboy. Kini human nakit-an sa departamento ang ebidensiya sa pag-uswag sa importasyon nga posibleng naghulga sa lokal nga mga prodyuser sa baboy.
Sa sulat ni Tiu Laurel ngadto kang Foreign Affairs Secretary Ma. Theresa Lazaro niadtong Oktubre 19, giklaro niya nga adunay igo nga inisyal nga ebidensiya aron sugdan ang imbestigasyon, lakip ang pagtino sa gidak-on sa kadaot o hulga sa lokal nga industriya nga mahimong resulta sa pagdaghan sa mga gina-import nga produkto.
Sakop sa imbestigasyon ang presko ug ‘frozen’ nga karne sa baboy, lakip ang mga lamang-loob ug tambok niini, ubos sa piho nga klasipikasyon sa ‘ASEAN Harmonized Tariff Nomenclature’.
Samtang, gipasalig ni Tiu Laurel nga igo ang suplay sa karne sa baboy sa nasud, nga mokabat sa 170 ka adlaw nga konsumo. Tungod niini, gilauman nga dili mosaka ang presyo sa karne sa baboy samtang nagkaduol ang Pasko.
