Gitinguha ni Pangulong Ferdinand Marcos Jr. nga mas daghang Pilipino ang makabenepisyo sa P20,000 nga tinuig nga pondo alang sa tambal ubos sa PhilHealth GAMOT program, samtang gitarget sa Food and Drug Administration o FDA nga mahuman sulod sa usa ka tuig ang mga aplikasyon nga dugay nang wala pa maaksyoni.
Atol sa meeting sa Malacañang niadtong Oktubre 21, gimandoan sa Presidente ang PhilHealth ug Presidential Communications Office nga palig-onon ang pagpakaylap sa impormasyon kabahin sa GAMOT benefit pinaagi sa mga barangay health worker, lokal nga pangagamhanan, tradisyonal nga media ug digital nga mga plataporma.
Matod sa taho, daghan sa mga rehistrado sa YAKAP program ang wala pa makabenepisyo sa maong programa.
Samtang, misaad si FDA Director General Margarita Gutierrez nga mahuman sulod sa usa ka tuig ang mga aplikasyon nga dugay nang naghulat sa aksyon sa ahensya. Plano sa FDA nga magkuha og dugang 125 ka evaluator ug lima ka systems analyst aron mapadali ang pagproseso sa mga aplikasyon.
Lakip usab sa mga lakang sa gobyerno ang pag-digitize sa mga serbisyo sa panglawas ug pagsulay sa bag-ong sistema alang sa mga botika sa Nobyembre.
Tumong sa maong mga lakang nga mapadali ang pagkuha sa tambal ug masiguro nga mas daghang Pilipino ang aktuwal nga makabenepisyo sa mga programa sa gobyerno alang sa panglawas.
