Narekord sa Department of Environment and Natural Resources o DENR ang unom ka dugong ug lima ka pawikan nga nangita og pagkaon sa kadagatan sa Kalamansig, Sultan Kudarat.
Nakita ang mga mananap gamit ang drone atol sa marine turtle monitoring niadtong Miyerkules, Oktubre 21, sa baybayon sa Poral nga naglangkob sa Barangay Santa Maria ug Barangay Cadiz.
Matud sa DENR Community Environment and Natural Resources Office o CENRO Kalamansig, misaka ang gidaghanon sa mga dugong gikan sa usa lamang niadtong miaging semestre ngadto sa unom karong semestreng kasamtangan.
Nagpakita kini sa kamahinungdanon sa kadagatan sa maong lungsod isip puy-anan sa nagkalainlaing mga mananap sa dagat.
Gipahinumdoman usab sa DENR ang publiko nga protektado ang mga dugong ug pawikan ubos sa Republic Act 9147, nga nagdili sa pagpatay, pagpangayam ug pagbaligya niini.
Giawhag ang publiko nga ireport dayon sa mga awtoridad ang mga nakitang mananap, mga pawikan o dugong nga na-stranded, ug bisan unsang kalapasan batok sa mga balaod sa pagpanalipod sa wildlife.
