Posibleng magpatuman ang Department of Agriculture o DA og restriksyon sa pag-import sa karne sa baboy sa unang semana sa Nobyembre.
Sumala kang Agriculture Secretary Francisco Tiu Laurel Jr., gikonsiderar sa ahensya nga ihunong una sulod sa 30 hangtod 60 ka adlaw ang pag-isyu sa Sanitary and Phytosanitary Import Clearances o SPSIC alang sa pipila ka produkto sa baboy nga ipadala sa nasud.
Lakip sa posibleng maapektuhan sa restriksyon ang pork belly, ubang parte sa baboy ug tibuok nga baboy.
Gikonsiderar kini sa DA tungod sa kabalaka nga ang nagkadaghang imported nga karne sa baboy naghulga sa panginabuhian sa mga lokal nga magbababoy.
Matod niini, naningkamot ang ahensya nga temporaryong limitahan ang pagsulod sa imported nga karne sa baboy aron makabangon ang lokal nga industriya ug malikayan ang dugang nga kapildihan sa mga mag-uuma.
Apan, gikinahanglan pa nga moagi sa legal nga pagsusi ug makakuha sa tukmang pag-aprubar sa gobyerno ang bisan unsang desisyon bahin sa maong restriksyon.
Samtang, girepaso sa Tariff Commission ang petisyon sa DA nga pagpataas sa taripa sa imported nga karne sa baboy aron mapanalipdan ang lokal nga mga prodyuser.
