Walay ipatuman nga pagsaka sa presyo sa mga batakang palaliton sa nasud hangtod sa Disyembre 31, 2026.
Kini human ang mga tiggama mipasalig sa Department of Trade and Industry (DTI) nga magpabilin ang kasamtangang presyo, bisan pa man sa pagsaka sa gasto sa sugnod ug mga hilaw nga materyales.
Matod ni Trade Secretary Cristina Roque, ang kasabotan naglangkob sa tanang nag-unang panginahanglanon ug nag-unang mga palaliton (basic necessities and prime commodities o BNPCs) nga anaa sa listahan sa DTI.
Lakip sa mga produkto nga gilaumang dili mosaka ang presyo mao ang sardinas, gatas, kape, pan, instant noodles, asin, sabon panglaba, tubig nga gibotelya, kandila, ug mga de-lata sama sa luncheon meat, meat loaf, corned beef, ug beef loaf. Apil usab niini ang suka, patis, toyo, ug sabon nga panglaba (bar soap).
Sumala ni Roque, gipasalig usab sa mga tiggama nga adunay igong suplay niini nga mga produkto, busa walay rason alang sa mga konsumidor nga mag-panic o mopalit og sobra ka daghan aron mag-stock.
Samtang, magpahigayon ang DTI og laing tigom uban sa mga tiggama aron hisgotan ang presyo sa mga produkto nga gigamit sa pagpangandam alang sa Noche Buena.
Matod ni Roque, gusto usab sa ahensya nga magpabilin nga dili mausab ang presyo niini nga mga produkto, apan dili pa siya makahatag og garantiya hangtod nga dili pa kini mahisgotan uban sa mga tiggama.
Mahitungod sa posibleng epekto sa El Niño, ang kalihim nag-ingon nga ang mga mag-uuma mahimong makakuha og mga pautang pinaagi sa kasamtangang mga pasilidad sa pautang sa Small Business Corporation, ang sanga sa DTI nga nagdumala sa pagpondo.
