ALABEL, SARANGANI- Naghatag og pinansyal nga tabang si Alabel, Sarangani Province Mayor Lilibeth “Ybing” Salarda sa mga pamilya sa duha ka lalaki nga gikatahong namatay human miapil sa tradisyonal nga ritwal nga gitawag og “Sulif” tungod sa panagbangi sa pagpanag-iya sa yuta sa Barangay Datal Anggas.
Personal nga gitunol ni Salarda ang P50,000 ngadto sa matag pamilya sa namatay, samtang gipas-an usab sa lokal nga panggamhanan ang gasto sa serbisyo sa punerarya, lakip ang mga lungon.
Lakip sa mga namatay si Gaspar Tusan Palasanon, 49 anyos, kansang haya gibisita sa mayor uban ni Municipal Administrator Vic Paul “Nonoy” Salarda, Municipal Councilor Bonifacio Pacquiao ug Chief of Police PLTCOL Canieso W. Golwingon niadtong Huwebes, Oktubre 22.
Ang laing namatay mao si Tonny Bulanon Mansag, 69 anyos, nga parehong residente ni Palasanon sa maong barangay.
Base sa inisyal nga impormasyon sa Alabel Municipal Police Station, gikatahong naglalis ang duha bahin sa pagpanag-iya sa usa ka luna sa yuta ug miuyon nga sulbaron ang panagbangi pinaagi sa maong ritwal nga gihimo sa usa ka sapa sa barangay.
Nagpaabot usab si Mayor Salarda og pakigduyog sa kasubo ngadto sa mga pamilya sa duha ka namatay, samtang gipasiugda sa lokal nga panggamhanan ang kamahinungdanon sa malinawon nga pagsulbad sa mga panagbangi aron malikayan ang susamang makapasubong panghitabo.
