Nakaplagang patay ang usa ka wala pa mailhing lalaki nga nakagapos ang mga kamot ug tiil, nakatabon ang mga mata ug adunay daghang samad sa lawas sa Purok 8, Barangay Metebogao, Kitaotao, Bukidnon, mikalabayng adlaw, Oktubre 21, 2026.
Base sa imbestigasyon sa mga otoridad, nadiskobrehan sa usa ka residente ang patayng lawas human makasimhot og baho gikan sa kanal sa hilit nga bahin sa barangay.
Nakit-an nga gigapos sa electrical wire ang mga kamot sa biktima, samtang nylon rope ang gigamit sa iyang mga tiil ug itom nga T-shirt ang gitabon sa iyang nawong.
Gibanabanang upat na ka adlaw nga patay ang biktima sa dihang nadiskobrehan, ug adunay daghang samad nga posibleng gikan sa hait nga butang, lakip ang mga pangos sa nawong.
Gidala ang patayng lawas sa Bukidnon Provincial Hospital sa Maramag alang sa post-mortem examination, samtang nagpadayon ang imbestigasyon sa kapulisan aron mailhan ang biktima ug matino kung kinsa ang responsable sa krimen.
