GENSAN- Nagpadayon ang City Agriculturist’s Office sa General Santos City sa paghatag og tabang ngadto sa mga lokal nga mag-uuma pinaagi sa pag-apod-apod sa ‘fuel subsidy cards’ gikan sa Department of Agriculture ug pagpagawas sa mga tseke alang sa ‘indemnity claims’ ubos sa Philippine Crop Insurance Corporation (PCIC).
Mikabat sa 141 ka mag-uuma ang nakadawat og ‘fuel subsidy cards’ nga nagkantidad og ₱5,000 matag usa, samtang tulo ka mag-uuma sa mais ang nakadawat og ‘indemnity cheques’ isip bayad sa kadaot sa ilang mga tanom tungod sa kakulang sa tubig o ‘water stress’.
Tumong sa maong mga programa nga pagaanon ang gasto sa produksyon sa mga mag-uuma ug mahatagan og pinansyal nga tabang ang mga nakaangkon og kadaot sa ilang mga pananom tungod sa wala damhang mga risgo ug kalamidad.
Pinaagi niini, gipangunahan sa lokal nga pangagamhanan ang padayong pagsuporta sa panginabuhian sa mga mag-uuma, pagpalig-on sa sektor sa agrikultura batok sa mga hagit, ug pagseguro sa padayong suplay sa pagkaon sa komunidad.
