GENSAN- Naangol ang usa ka 59-anyos nga drayber sa trisikad human kini mabangga sa duha ka sakyanan sa South Cotabato–Sarangani Road, atubangan sa Doña Soledad Subdivision sa Barangay Labangal, General Santos City, pasado alas dose sa kaadlawon karong Oktubre 16, 2026.
Base sa inisyal nga imbestigasyon sa kapulisan, nagbiyahe ang trisikad gikan sa Police Station 2 padulong sa Hadano samtang ang usa ka tractor-trailer truck nga adunay container van ug usa ka Toyota Fortuner nagbiyahe sa pikas direksyon padulong sa Police Station 2.
Sa dihang misulay sa pagliko pa-wala ang trisikad padulong sa Doña Soledad Subdivision, nabanggaan kini sa Toyota Fortuner nga giingong kusog ang padagan, hinungdan nga natangtang ang sidecar ug natumba ang drayber.
Nadasmagan usab sa tractor-trailer truck ang motorsiklo ug giguyod kini sa gilay-on nga mokabat sa 15 metros.
Nakaangkon og daghang samad sa lawas ang drayber nga giila nga si Joselito Cabayao, residente sa Barangay Labangal, ug gidala sa Dr. Jorge P. Royeca Hospital alang sa medikal nga pagtambal.
Dako usab ang kadaot sa motorsiklo, samtang hingpit nang naguba ang sidecar niini.
Samtang, padayon ang hot pursuit operation sa kapulisan aron mailhan ug madakpan ang mga drayber sa Toyota Fortuner ug tractor-trailer truck nga mikalagiw padulong sa Makar Traffic Light, lakip na ang pag-review sa CCTV footage ug pagpangolekta sa mga pahayag sa mga saksi.
