Naka-break og bag-ong Guinness World Record ang usa ka dog pool party sa Nevada, Estados Unidos human 296 ka iro ang mitambong sa maong kalihokan.
Ang ‘Doodlepalooza 2026’, nga gipangunahan sa We Love Doodles, gitambongan sa 296 ka ‘poodle mixes’ uban sa ilang mga tag-iya niadtong Domingo sa Cowabunga Canyon Vegas water park.
Naglingaw ang mga iro pinaagi sa paglangoy sa ‘wave pool’, ‘splash pad’ ug uban pang mabaw nga mga bahin sa ‘water park’.
Usa ka adjudicator gikan sa Guinness World Records ang mitambong aron kumpirmahon ang bag-ong rekord, nga milapas sa kanhing rekord nga 277 ka iro nga natala sa usa ka ‘water park’ sa Florida niadtong Mayo.
Gipahigayon ang kalihokan isip kabahin sa selebrasyon sa ‘National Dog Week’ ug nakatigom usab og pondo alang sa ‘Doodle Rescue USA’.
Sumala kang Danielle Dunker sa Doodle Rescue USA, ang rekord nahimo tungod sa mga iro ug mga tawo nga mitambong aron makatabang sa mga iro nga nanginahanglan og rescue, mga pamilyang temporaryong moatiman sa mga iro ug permanenteng panimalay.
