Gipasabot ni Police Corporal Sittie Minyanie M. De La Torre ang mga probisyon sa Republic Act Number 9262 o Anti-Violence Against Women and Their Children Act of 2004, ilabina ang mga proteksyon nga gihatag niini sa kababayen-an ug ilang mga anak batok sa pagpang-abuso.
Sumala kang De La Torre, sakop sa maong balaod ang mga kaso sa kapintasan nga mahimo sa kasamtangan o kanhi bana, partner o karelasyon, lakip ang tawo nga adunay sexual o dating relationship sa biktima.
Alang sa mga nakasinati og pagpang-abuso, importante nga unahon ang ilang kaluwasan ug mangayo dayon og tabang sa barangay, emergency services o sa Women and Children Protection Desk o WCPD sa labing duol nga police station.
Matud pa niya, sa pagreport sa WCPD, kuhaon ang sumbong ug salaysay sa biktima, susihon ang mga impormasyon ug ebidensiya sama sa screenshots ug mga litrato, ug i-refer ang biktima alang sa medical examination kon gikinahanglan.
Mahimo usab nga makadawat og libreng medical attention sa emergency room ang mga biktima nga adunay mga samad o injuries nga resulta sa pagpang-abuso.__
