Gimandoan sa Court of Appeals ang pagpagawas sa kanhing modelo nga si Deniece Cornejo human gipamub-an ang gipahamtang kaniya nga sentensya sa pagkakulong may kalabotan sa kasong ‘serious illegal detention’ nga gipasaka sa aktor nga si Ferdinand Hipolito o mas nailhan nga Vhong Navarro.
Sumala kang Atty. Ferdinand Topacio, abogado ni Cornejo, gikonsiderar nga ‘time served’ ang kapin duha ka tuig nga pagkakulong sa iyang kliyente human sa conviction niini sa Regional Trial Court.
Gitabangan usab matod siya sa Public Attorney’s Office ug uban pang mga abogado sa pagproseso sa mga dokumento alang sa iyang pagpagawas.
Gilauman nga mahitabo ang iyang pagpagawas sa unang bahin sa umaabot nga semana.
Ang pagkakulong sa kanhing modelo nag-ugat sa pagpangbunal nga nasinati ni Navarro sulod sa iyang condominium unit, diin si Cornejo usa sa mga gitudlo nga nalambigit sa maong insidente, uban sa iyang mga higala.
