Naghimo og kasaysayan ang Pinay singer nga si Carmelle Collado human midaog sa bag-o lang gipahigayon nga Eurovision Song Contest Asia.
Siya ang unang nakadaog sa maong regional competition.
Gikanta ni Collado ang awiting “Sobra-Sobra” nga gisulat nila Nica del Rosario ug Mat Olavides, diin nakakuha kini og kinatibuk-ang 211 points.
Nanguna siya sa Jury Voting nga nakakuha og 93 points, samtang nakadawat usab og 118 points gikan sa mga boto sa audience.
Misunod sa ikaduhang pwesto ang Mang x Daou sa Thailand nga nakakuha og 170 points, samtang ikatulo si Toc Tien sa Vietnam nga nakatigom og 164 points.
Matud ni Collado, nagtan-aw siya sa maong kadaugan isip oportunidad dili lamang alang sa iyang kaugalingon, kondili usab alang sa Original Pilipino Music o OPM aron mas daghang tawo ang makadiskobre sa mga awiting Pilipino.
Siya ang mahimong representante sa Asya sa Eurovision Song Contest 2027 nga ipahigayon sa Burgas, Bulgaria.
