Gideklarar nga disaster area ang Bangkok, Thailand, human sa grabeng pagbaha tungod sa kusog nga pag-ulan sulod sa kapin 48 ka oras.
Sakop sa maong deklarasyon ang tanang 50 ka distrito sa kapital, diin daghang dalan ang nalunop sa tubig ug napuno ang mga kanal.
Sumala sa mga report, kapin 300 millimeters sa ulan ang natala sa pipila ka bahin sa Bangkok, hinungdan sa pag-awas sa mga kanal ug pagbaha sa mga kabalayan.
Gihangyo ni Bangkok Governor Chadchart Sittipunt ang mga residente nga magpabilin sa ilang mga balay tungod sa peligro sa pagbaha.
Nag-andam usab ang mga otoridad og mga ‘’sandbag’’ ug temporaryong ‘’shelter’’ alang sa mga apektadong residente.
Gipasidaan sa Thai Meteorological Department nga magpadayon ang kusog hangtod kusog nga pag-ulan sa Bangkok ug ubang bahin sa Thailand hangtod Septiyembre 27.
Samtang, gipadayon sa mga otoridad ang ilang ‘’flood response’’ ug uban pang mga lakang aron mapamenos ang epekto sa pagbaha sa siyudad.
