Gibasura sa Bacoor Regional Trial Court ang apela sa aktor nga si Archie Alemania ug gipadayon ang iyang pagkasad-an sa kasong ‘acts of lasciviousness’ batok sa aktres nga si Rita Daniela.
Sa desisyon sa RTC Branch 116 nga gipetsahan Agosto 3, 2026, gipamatud-an niini ang desisyon sa Bacoor Municipal Trial Court in Cities Branch 2 niadtong Oktubre 2025 nga nakaplagang sad-an si Alemania nga walay makatarunganong pagduhaduha.
Nagsugod ang kaso niadtong Oktubre 2024 human mosang-at og reklamo si Daniela kalabot sa giingong insidente atol sa usa ka ‘Thanksgiving party’ sa Bacoor City niadtong Septiyembre 2024.
Sumala sa aktres nga gipugos siya ni Alemania og halok ug gihikap batok sa iyang kabubut-on ug walay pagtugot.
Sa iyang apela, gikuwestiyon ni Alemania ang mga sirkumstansya sa insidente, ilabina ang kahimtang sa sakyanan diin giingong nahitabo ang maong insidente, ug iyang giingong imposible ang mga lihok nga gihulagway ni Daniela tungod sa limitado nga luna.
Apan wala mouyon ang korte sa iyang argumento ug miingon nga posible ang pagpugong, paghalok ug paghikap sulod sa sakyanan bisan og dili komportable o lisod kini buhaton, busa gipadayon ang iyang pagkasad-an ug ang silot nga hangtod usa ka tuig nga pagkakulong, lakip ang P20,000 nga bayad alang sa ‘civil indemnity’ ug laing P20,000 alang sa ‘moral damages’.
