Gipaabot nga aprobahan sa US ang pagbaligya og hangtod sa 60,000 ka bomba ngadto sa Israel.
Sa bag-ong ‘multibillion-dollar’ nga ‘package deal’ tali sa duha ka nasod, gipaabot nga ibaligya sa US ang 60,000 ka mga bomba nga grabeng makadaot diin ang matag usa motimbang og 2,000 pounds o 907 ka kilo.
Gi-aprobahan sa Trump administration ang maong kasabutan ug opisyal na usab nga gipahibalo ang US Congress bahin niini.
Mokabat sa $2.8 billion ang kinatibuk-ang kantidad sa maong kasabutan tali sa duha ka nasod.
Daghang kritiko ang misaway sa maong kasabutan tungod kay naglangkob kini sa pipila sa labing peligroso nga mga gamit panggubat sa kasaysayan.
Sa pagkakaron, dili pa klaro kung asa gamiton sa Israel ang dakong bulto sa mga bomba samtang nagpadayon ang gubat niini sa Middle East.
Ang mga bomba nga motimbang og 2,000 pounds kasagarang gigamit alang sa ‘ground penetration’ ug pagpabuto sa mga ‘underground bunker’, apan makapahinabo usab kini og dakong kadaot sa mga lapad nga lugar.
