Gisentensiyahan og 25 ka tuig nga pagkabilanggo sa International Criminal Court (ICC) ang kanhi presidente sa Kosovo nga si Hashim Thaci.
Kini human mapamatud-an nga sad-an siya sa kasong ‘war crimes’.
Sa gihimong pagdungog, gisentensiyahan ang 58-anyos tungod sa mga krimen atol sa gubat alang sa kagawasan sa Kosovo batok sa Serbia niadtong 1990.
Sa maong gubat, kapin 10,000 ka tawo ang nangamatay.
Gipagawas ang hukom human sa tulo ka tuig nga pagdungog sa mga kaso nga naglakip sa pagpatay, ilegal nga pagdakop, pagpang-torture ug malupigon nga pagtratar.
Apil usab sa kaso ang pipila ka alegasyon batok kaniya nga wala pa mapamatud-an.
Si Thaci usa sa mga nagtukod ug kanhi commander sa Kosovo Liberation Army o KLA, ang grupong nakigbisog alang sa kagawasan sa Kosovo ug giisip nga bayani didto.
Gipasanginlan siya sa pagpatay sa mokabat sa 100 ka tawo ug sa pagkawala sa pipila pa ka mga indibidwal.
Kauban niyang gisentensiyahan ang tulo pa ka kanhing commander sa KLA.
Gitukod ang Kosovo Liberation Army o KLA niadtong 1990 isip militanteng grupo sa mga ethnic Albanian nga niadtong panahona sakop matod pa sa Serbia ang Kosovo, atol sa gubat batok sa mga Serb nga minoriya.
Nahimong unang Prime Minister sa Kosovo si Thaci human kini mideklarar og kagawasan niadtong 2008, ug sa ulahi nahimong presidente. Apan niundang siya sa puwesto niadtong 2020 aron atubangon ang kaso sa The Hague.
